‘सयकडा दश’बारे मनोज गजुरेल भन्छन् : भ्रष्टाचार रोक्न प्रेम जरुरी

0

अभिनेता मनोज गजुरेल मंगलबार आफू अभिनित फिल्म ‘सयकडा दश’को बटमलाइन सुनाउँदै थिए : ‘भ्रष्टाचार रोक्न प्रेम जरुरी ।’ उनले राजनीतिभन्दा प्रेम भ्रष्टाचारविरुद्ध प्रभावकारी औषधि हुने बताए ।

चर्चामा रहेको वाइडबडी भ्रष्टाचार प्रकरणको समाधान दीर्घकालिनरुपमा राजनीतिभन्दा प्रेमभित्र खोजिनुपर्ने उनको तर्क थियो । उनले फिल्मलाई कला र मनोरञ्जनभन्दा समाजको रुपान्तरणका लागि प्रयोग गर्नुपर्ने खाँचो औंल्याए ।

‘सयकडा दश’ले मंगलबार राजधानीमा अनलाइन मिडियासँग अन्तरसंवाद कार्यक्रम आयोजना गरेको थियो । निर्माता एवं अभिनेता राजाराम पौडेलले आफ्ना लागि पैसाभन्दा कलाले अर्थ राख्ने बताए । ‘दुई सय जति फिल्म गरेँ हुँला, केही पेन्डिङमा होलान् । मेरा लागि सयकडा दश सर्वोत्कृष्ट हो’ उनले दाबी प्रस्तुत गरे ।

अभिनेत्री करुणा श्रेष्ठ र अभिनेता अमृत ढुंगानाले चरित्र चित्रणबारे चर्चा गरे । ‘गरेजति फिल्ममा मैले पात्र र शैलीमा नयाँपन पस्कने प्रयास गरेको हुन्छु’ ढुंगानाले भने । डेब्यु गर्ल श्रेष्ठको भनाइमा ‘सयकडा दश’ फिल्म–मेकिङ सिक्ने पाठशाला पनि हो ।

निर्देशक रामशरण पाठक रिलिज अगाडि प्राप्त प्रिभ्यूले पुलकित सुनिए । भन्छन, ‘गीत र ट्रेलरले दिलाएको सुखद फिडब्याकले खुशि अवश्य छु ।’ उनका अनुसार फिल्मले माघ पहिलो सातादेखि देश दौडाहा थालनी गर्दैछ । माघ १८ मा फिल्म रिलिज हुँदैछ । फिल्मलाई दर्शन नेपाल क्रिएसनले निर्माण गरेको हो ।

तस्विरः शंकर गिरी

Share.

About Author

Leave A Reply